5 деца на кислородна поддршка во Козле – за две недели дури 1.000 заразени малолетници

Прочитај за: < 1 минута

Во детската болница во Козле се хоспитализираат се повеќе деца заразени со коронавирусот, а пет од нив се на кислородна поддршка, објави Сител.

Според информациите сите имаат ниска сатурација и сериозна клиничка слика, но нивната состојба според лекарите е стабилна. Од 20 кои лежат во болничките соби дури 15 се школски деца. Освен наод на белите дробови пациентите имаат и висока температура и глад за воздух.

Педијатрите предупредуваат дека овој бран е многу посериозен од претходните и бројот на приеми и прегледи е зголемен со стартот на учебната година.

– Моето мислење како педијатар иако тоа го делат и моите колеги од болницата е дека ќе имаме зголемување на бројот. Сега сè уште е сонце и децата се надвор, но кога ќе бидат затворени прозорците во училиштата тогаш ќе има зголемен број – вели др. Мими Поповска, педијатар во детската болница во Козле.

Ако во претходните бранови во болницата во Козле од три прегледи едно дете имало позитивен наод на ковид, со делта сојот од три во ординација сите три се позитивни. Педијатрите велат дека секоја висока температура и кашлица не е ковид и родителите веднаш да не трчаат во Козле туку да побараат прво помош кај матичните.

– Имаме во чекалните и деца со температура кои не се позитивни и позитивни и доаѓа до мешање на инфекцијата па и тие што немаат можат да добијат. Затоа прво кај матичен и ако состојбата е сериозна болницата е 24 часа достапна за сите пациенти, вели др. Поповска.

Дека состојбата е сериозна покажуваат и бројките од болницата – минатиот месец имале дури 2.000 прегледи и 214 деца со ковид-19. Овој месец само за две недели околу 500 пациенти поминале низ ординациите.

Од Институтот за јавно здравје ни доставија податок дека од први до 14 септември со ковид 19 регистрирале 937 деца од 0 до 19 години. Бројките покажуваат дека повеќе од 80 проценти се ученици во основните и средни училишта.

SHARE